GENERAL SANTOS CITY – Gipailawom sa adjudication sa Bureau of Immigration and Deportation ang tulo ka babaye nga Indonesian national nga nasikop sa Alabel Sarangani Province.
Matud ni Police Lt. Col. Teody Condesa, tigpamaba sa Sarangani Provincial Police Office nga nakadawat sila ug impormasyon kalabutan sa tulo ka babaye nga nakig-live-in ug mga mananagat.
Giila niini ang tulo nga silang Kristina Guniwalanta 25 nga taga Betung, Sulawesi, Masyi Supitguni 42 ug Eradi Deborah Mahaling 33 pulos taga Manado Indonesia.
Matud sa opisyal nga posebling gipalusot sa tulo ka mananagat ang tulo gikan sa Indonesia ug gidala sa Kawas, Alabel Sarangani.
Gani dihang gipangitaan og mga papeles sa taga BID ang tulo pulos walay gipakita hinungdan nga gidala gilayon sa Davao City.
Usa sa tumong nganong nagpahugot sa seguridad ang mga otoridad gumikan sa nahitabo bag-uhay lamang didto sa Sulu human nasudlan ug suicide bomber nga gikan sa ubang nasud.
Matud sa opisyal nga kung mapamatud-an nga Illegal nga misulod dinhi sa nasud ang tulo gilayon kini nga ipadeport balik sa ilang nasud.
