SARANGANI – Dili matupngan ang kalipay sa 28 ka Job Order (JO) workers sa Sarangani Provincial Capitol human sila gi-regular sa trabaho, nga personal nga gi-anunsiyo ni Governor Rogelio “Ruel” Pacquiao.
Gikataho nga ang kadaghanan sa maong mga empleyado nagaserbisyo na sulod sa kapin duha ka dekada, ang uban kanila ang miabot na og 31 ka tuig nga pagpanarbaho isip mga JO workers.
Dugang pa, gi-anunsiyo usab sa Gobernador nga gipataas ang daily wage sa mga JO workers sa Kapitolyo gikan sa P400 ngadto na sa P450 matag-adlaw, nga gikalipay usab sa tanang mga trabahante.
Giingon sa mga empleyado nga dako kini og ikatabang sa ilang pang-adlaw-adlaw nga panginahanglanon.
Ang maong lakang gilauman nga magahatag ug inspirasyon ug paglaum sa ubang mga long-time workers nga nagpaabot sa oportunidad nga ma-regular ug mahatagan og mas lig-on nga kahimtang sa serbisyo publiko.
Gipasiugda ni Gov. Pacquiao nga padayon siya nga motutok sa kaayohan sa mga empleyado, ug kini usa lamang sa daghang repormang padulong pa niyang ipatuman.
