GENERAL SANTOS CITY – Dungan nga gipangdugmok gamit ang mga maso og martilyo ang 27 ka slot machine kon tolendoy nga nakumpiska sa mga operasyon sa kapulisan sa dakbayan.
Usa ka programa ang gipahigayon sa Camp Fermin G. Lira kung asa gipangunahan ni City PNP Director Col. Aden Lagradante kauban ang mga City Councilors sa dakbayan ang pagguba sa maong matang sa ilegal nga sugal.
Matud pa ni City Councilor Edmar Yumang nga kini ang tubag sa nadawat niining reklamo sa mga ginikanan kalabot sa nagkadaghan nga slot machine sa syudad.
Sa pahayag sa konsehal nga makadaut sa paghuna-huna sa mga kabataan ang nasampit nga matang sa dula og makaapekto usab sa pagtuon.
Nasayran nga niaging Dominggo gipahigayon ang operasyon sa kapulisan human nga gipangkuha ang mga slot machine ug gipangkasuhan ang mga tag-iya.
