Malungon, Sarangani Province – Usa ka 23-anyos nga lalaki ang namatay human kini gipusil sa wala mailhing mga suspek samtang nagmaneho og motorsiklo, Sabado sa gabii, September 27, 2025, didto sa bahin sa national highway sa Sitio Coronado, Barangay Malalag.
Ang biktima giila sa kapulisan nga si Wilver Christien Santos, ulitawo ug residente sa Purok Antarium, Barangay Malandag. Base sa imbestigasyon, nagbiyahe si Santos kauban ang lain pang motorsiklo diin adunay duha ka sakay. Apan human sa pila ka minuto, mibalik kini uban ang laing kauban ug sa dihang nakaabot sa highway, nakadungog og lalis ang mga residente tali sa driver ug backrider sa motorsiklo nga giangkas sa biktima.
Paglabay sa pipila ka gutlo, misunod dayon ang pagpabuto sa armas de fuego nga didto napunta sa lawas ug ulo sa biktima. Nakaikyas pa kadiyot si Santos ug nakadagan, apan midapa gihapon tungod sa mga samad nga iyang nadawat.
Ang mga suspek midiretso og dagan palayo padulong sa Poblacion, Malungon human sa insidente. Gisulayan pa og dalhon sa ospital ang biktima, apan gideklarar kini nga dead on arrival.
Padayon pa ang hot pursuit operation sa kapulisan aron mailhan ug madakpan ang responsable sa maong pagpamusil.
