GENERAL SANTOS CITY – Nadala sa Dr. Jorge P. Royeca Hospital ning dakbayan ang 21 anyos nga lalaki human nga naigo sa matud pa sumpak dihang nitan-aw lamang sa natigayong riot sa mga sukarap kagabie sa Prk Ngilay, Brgy. Tambler ning dakbayan.
Giila ang biktima nga si Josarte Santos, nga taga Prk. Banwalan Tambler.
Gibutyag nga nakadungog ang biktima nga adunay riot sa mga sukarap sa Prk Ngilay hinungdan nga niadto sa lugar.
Samtang,nakisusi, kalt nga nibati ang biktima og pagpaminhod sa wala nga bahin sa iyang paa og adunay niagas nga dugo.
Hinungdan nga gitabangan og dala ang nasampit sa ospital.
Gitudlong responsable sa nadangatan sa biktima ang mga nagriot nga mga sukarap sa lugar.
Samtang, mga sukarap gihapon ang gitudlong responsable sa pagdunggab sa usa ka mananagat sa Brgy. Calumpang ning dakbayan kagabie.
Giila ang biktima nga si Jimmy Gataw, 22 anyos nga taga Brgy. Fatima ning dakbayan.
Matud sa report, nagtagay-tagay ang biktima kauban ang mga higala og dihang pauli na sa ilang balay, giatangan kini sa grupo sa mga batan-on og gitabangan og dunggab gamit ang icepick.
Nakaangkon kini og daghang samad dinunggaban sa lawas hinungdan nga gidala sa Dr. Jorge P. Royeca Hospital.
Sa pagkakaron padayon pang nangalap og impormasyon ang kapulisan aron mailhan ang mga suspek.
