Giaprobahan sa Budget Amendments Review Subcommittee (BARSc) sa House Committee on Appropriations ang P32.06 bilyones nga usbaw sa budget alang sa Assistance to Individuals in Crisis Situations (AICS) program sa Department of Social Welfare and Development (DSWD).
Atol sa deliberasyon sa BARSc niadtong Lunes, si House Minority Leader ug 4Ps Rep. Marcelino Libanan niduso og mosyon sa pagpataas sa budget sa AICS alang sa 2026. Ubos sa 2026 National Expenditure Program (NEP), ang AICS gigahinan og kapin sa P26 bilyones.
Si Guimaras Rep. JC Rahman Nava, ang sponsor sa DSWD budget ug vice chairperson sa Appropriations Committee, nipadayag og suporta sa sugyot nga usbawan ang budget para sa AICS.
Matod ni Nava nga ang budget sa AICS karong tuiga kay P44 bilyones ug mikunhod kini ngadto sa P27 bilyon ubos sa 2026 NEP.
Ang Appropriations Committee Chairperson ug Nueva Ecija Rep. Mika Suansing niingon nga ang sugyot ni Libanan mopataas sa AICS fund ngadto sa P59.04 bilyones.
Giaprobahan sa BARSc ang gisugyot nga amendment.
Milihok usab ang Libanan nga dugangan ang pundo alang sa Department of Labor and Employment (DOLE) Tulong Panghanapbuhay sa Ating Disadvantaged/Displaced Workers (TUPAD) Program og P14.819 bilyon ug ang DOLE Integrated Livelihood and Emergency Employment Program (DILEEP) og P3.312 bilyon.
Usab, pagdugang sa pundo alang sa Technical Education and Skills Development Authority (TESDA) Special Training for Employment Program (STEP) (P635.2 milyones), ug Training for Work Scholarship Program (P356 milyones).
Nipadayag og suporta sa maong sugyot mao sila si Parañaque City Rep. Brian Raymund Yamsuan, Surigao del Sur Rep. Romeo Momo Sr., FPJ Panday Bayanihan Rep. Brian Poe Llamanzares, ug Lanao del Sur Rep. Zia Alonto Adiong, apan niinsistir nga kini ipatuman sa patas ug sakto.
Gawas sa TUPAD, giaprobahan usab sa BARSc ang gisugyot nga usbaw sa pundo alang sa laing tulo ka programa nga nahisgutan.
