GENSAN – Malipayong gisaysay ni Atty. Barry C. Quimnoy, usa sa mga nakapasa sa bag-o lang migawas nga resulta sa Bar Examination kagahapon, ang iyang kasinatian atol sa pagkuha sa eksaminasyon.
Sa pakighinabi sa Bombo Radyo Gensan, gibutyag niya nga tungod sa sobrang kakulba, nabilin niya ang iyang pack lunch maong wala siya’y pagkaon sa paniudto ug nag-ampo na lang nga unta adunay mohatag kaniya og makaon, nga iyang gipasalamat nga natabangan siya sa iyang facilitator.
Matod pa niya, tulo ka adlaw ang Bar Exam ug dako kaayo ang tabang sa iyang review center sa paggiya kaniya sa preparasyon.
Dugang pa, usa ka dakong hagit alang kaniya ang pag-review tungod kay samtang nag-andam sa eksaminasyon, nagtrabaho usab siya isip pulis, ug sa mga higayon nga dili kaayo busy sa trabaho, ginadali-dali na lang niya og basa ang iyang cellphone aron makarepaso, nga maoy usa sa pinakadakong kalisdanan nga iyang nasinati atol sa pag-review.
Gipahayag usab ni Atty. Quimnoy ang iyang dakong pasalamat sa suporta sa iyang pamilya, mga kauban sa trabaho, ug sa tanang nakatabang kaniya sa iyang pagpaningkamot.
Matod niya, ang kalampusan sa Bar Exam dili lamang tungod sa kaugalingong paningkamot, apan usab sa pag-ampo, giya sa review center, ug sa suporta sa mga tawo nga nagtuo kaniya
