Gisugyot ni Senator Erwin Tulfo ang 20% nga diskwento sa mobile load ug internet services para sa mga estudyanteng Pilipino aron makatabang sa mga pamilyang naglisod sa pagpondo sa online learning.
Ubos sa Senate Bill No. 2275 o Student Load Discount Act nga gisumite ni Tulfo, sakop sa diskwento ang mobile prepaid load, mobile postpaid plans ug mobile internet packages.
Tumong sa maong sugyot nga maminusan ang dugang gasto sa mga estudyante ug ilang mga ginikanan, ilabina karon nga kasagarang napugos ang mga eskwelahan sa pagbalhin ngadto sa online classes tungod sa dili maayong panahon.
Sumala ni Tulfo, dili na igo ang karaang konsepto sa class suspension nga nagpasabot nga walay klase, tungod kay daghang mga eskwelahan karon ang naggamit og online learning aron malikayan ang pagkaputol sa pagtuon.
Sakop sa sugyot ang mga Pilipinong naka-enroll sa elementarya, sekondarya, technical-vocational ug higher education, gawas sa post-graduate studies.
Magamit ang 20% nga diskwento sa tibuok tuig, lakip ang weekends ug holidays. Kinahanglan lamang magpakita ang estudyante og school ID o proof of enrollment ug birth certificate aron makabenepisyo niini.
Gikinahanglan usab ang mga telecommunications companies nga ipatuman ang diskwento alang sa mga kwalipikadong estudyante, samtang adunay silot alang sa mga molapas sa maong probisyon.
Giinsistir ni Tulfo nga dili angay mahimong babag sa pagtuon sa usa ka estudyante ang kakulang sa ikapalit og mobile data o internet.
