Nasayran nga mokabat sa 20 ka mga baril nga narehistro kay Ronald “Bato” Dela Rosa ang boluntaryong gisurender sa Philippine National Police (PNP) sa Davao City human bawi-an ang iyang firearms license ug rehistro.
Sumala sa PNP, ang maong mga armas karon anaa na sa kustodiya sa Regional Civil Security Unit 11 alang sa husto nga safekeeping ug pagdumala.
Giingon sa kapulisan nga ang pagbawi sa lisensya gihimo subay sa Republic Act No. 10591 o Comprehensive Firearms and Ammunition Regulation Act, nga naglatid nga ang mga indibidwal nga adunay kaso kriminal nga adunay silot nga labaw sa duha ka tuig dili na tugotan nga magpanag-iya og armas de fuego.
Padayon nga gi-review sa mga otoridad ang mga rekord ug dokumento aron masiguro ang pagsunod sa balaod ug hapsay nga proseso sa pagdumala sa mga armas nga gisurender.
