GENERAL SANTOS CITY – Kasong illegal possession of firearms and ammunitions ang ipasang-at ning adlawa batok sa duha ka purok officials nga nasikop sa natigayong raid sa Purok 2, Lanton, Apopong ning siyudad.
Kahinumduman nga base sa search warrant, gisulod sa kapulisan kaniadtong Biyernes sa gabii ang panimalay ni Edgar Decejas, human matud pa makadawat ug impormasyon ang mga otoridad kalabot sa ginatago matud pa niining pusil sa iyang balay.
Sa sala ibabaw sa aparador, nakita ang homemade revolver nga may mga bala. Sunod nga gisulod sa raiding team ang balay sa silingan niini nga si Jose Delfin.
Gikabutyag nga may misumbong sa kapulisan nga may gihuptan usab kining pusil, hinungdan nga gi-search ang iyang panimalay.
Sa iyang lawak, ilawom sa aparador nakita ang usa ka bag nga may unod nga usa ka caliber 45 pistol nga may mga bala. Wala matud pay napakita nga lisensya sa pusil.
Gipanghimakak matud pa ni Delfin nga iyaha ang pusil.
