BUTUAN CITY – Patay ang duha human gipamusil sa wala ma-ilhing mga suspetsado sa Purok 1, Barangay Bayugan 2, lungsod sa San Francisco, Agusan del Sur, pasado alas-4:30 sa kaadlawon kagahapon. Butuan city guide
Gi-ila sa kapulisan ang mga biktima nga sila Joselito Ubamen Rollorota ug Juliet Custodio, pulos hingkod ang edad ug parehong residente sa Purok 6, Sitio Dayo, Brgy Consuelo, lungsod sa Bunawan, Agusan del Sur..
Base sa inisyal nga imbestigasyon sa San Francisco Municipal Police Station, nagbyahe ang duha sakay sa tricycle gikan sa Rosario padulong sa San Francisco proper dihang kalit silang gipamusil sa mga suspek gamit ang wala pa matino nga kalibre sa armas.
Si Rollorota namatay on-the-spot tungod sa daghang samad pinusilan, samtang si Custodio gidala pa sa Democrito O Plaza Memorial Hospital apan gideklara nga dead on arrival.
Narekober sa kapulisan ang duha ka basiyo sa bala sa crime scene, samtang ang tricycle gidala sa San Francisco Municipal Police Station alang sa hustong disposisyon.
Ang mga ebidensya gidala na ngadto sa Agusan del Sur Provincial Forensic Unit alang sa ballistic examination, ug nagpadayon pa ang imbestigasyon aron masuta ang motibo ug madakpan ang mga responsable sa krimen.
