BACOLOD CITY-Duha ang patay ug 11 ang angol human gidaro sa usa ka pribadong sakyanan ang prosesyon sa Semana Santa sa dalan Granada-Alangilan sa Purok 20, Barangay Alangilan, dakbayan sa Bacolod alas 7:20 sa gabii niadtong Biyernes Santo.
Sumala sa Traffic Enforcement Unit sa Bacolod City Police Office, nagasubay ang Toyota Innova nga pula gikan sa Barangay Alangilan padulong sa Barangay Granada sa dihang nabanggaan niini ang usa ka traysikol nga ni-overtake sa lead patrol car nga nag-escort sa religious procession.
Tungod sa kakusog sa impact, nalagpot ang traysikol, nitugpa sa police patrol car una pa nabangga sa multi-cab.
Dead on the spot ang drayber sa traysikol nga giilang si Jonelo Solan Sr, 66, taga Purok 6, Barangay Alangilan.
Naangol usab ang lima ka mga pasahero nga sakay sa traysikol, usa niini namatay samtang nagpaalim sa tambalanan.
Lima ka menor de edad nga miapil sa prosesyon nakaangkog samad; silang tanan residente sa Barangay Alangilan.
Si PMsg Domingo Villar, ang drayber sa patrol car, ug iyang kaubang opisyal nga si PMsg Freddie Jimenez nakahiagom og minor injuries sa insidente.
Ang mga sakay sa Toyota Innova una nga miikyas palayo sa dapit apan nasikop ra usab sa mga mirespondeng mga pulis dili layo sa dapit kung asa nahitabo ang insidente.
Ang sakyanan gimaneho ni Jagpret Shingh, 37-anyos nga Indian national nga nagpuyo sa Buena Park Subdivision, Barangay Villamonte, dakbayan sa Bacolod.
Ang iyang mga pasahero mga Indian usab giila nga silang Hajrgit Singh, Tarenjeet Singh, Satver Singh, ug Balwinder Singh Gill—tanan residente sa parehas nga subdivision.
Ang atubangan sa Innova naguba.
Human sa ilang pagkasikop, gidala sa tambalanan si Jagpret Shingh ug usa sa iyang mga kauban aron matambalan ang ilang mga samad, samtang ang nahibiling tulo anaa sa kustodiya sa kapolisan sa Police Station 5.
Padayon ang ginahimong imbestigasyon sa mga otoridad sa natigayong insidente.
