GENERAL SANTOS CITY – Padayon ang imbestigasyon nilang P/Lt. Col. Marvin Dua-dua, hepe sa Polomolok Municipal Police Station kalabutan sa pagpamusil nga natigayon sa Barangay Crossing Palkan kagahapon sa hapon nga gikamatay sa duha ka mga biktima ug pagkasamad sa laing usa.
Kini human gipamusil ang tulo ka mga biktima samtang naa sa dalpin sa dalan.
Matud ni Dua-dua nga patay silang Joel Tamayo 28 anyos ug Jeffrey Apundar 25 samtang samaron ug nadala sa tambalanan ang nagpangalan Clifford Apundar 18 pulos mga residente sa nasampit nga lugar.
Ang tulo ang pulos nga bamboo craft maker sa lugar gipamusil sa wala maihap nga mga suspek nga nagsakay ug pick-up truck.
Pagsaysay sa mga residente sa lugar nga sunod-sunod nga buto sa pusil ang ilang nadungog gikan sa nahisgutang sakyanan.
Wala matud pa naplakahan ang sakyanan nga mipadulong sa direction sa Tupi South Cotabato.
Matud kang Dua-dua nga personal grudge og droga ang gitan-aw nga motibo sa pagpamusil sa mga biktima.
