Nagbangga sa ere ang duha ka fighter jets atol sa usa ka air show sa northwestern state sa Idaho niadtong Domingo, Mayo 17.
Sa usa ka pahayag, gikumpirma sa Gunfighter Skies Air Show ang insidente sa eroplano nga nahitabo duol sa Mountain Home Air Force Base, duha ka milya sa amihanan-kasadpan sa maong air force base.
Karon anaa na sa lugar sa bangga ang mga emergency responders ug padayon ang imbestigasyon sa insidente samtang ipagawas pa ang dugang detalye sa oras nga mahimo na kini.
Base sa report, luwas nga nakaikyas ang tanang upat ka crew members gikan sa duha ka Boeing EA-18G Growler sa US Navy human sila maka-eject ug mikanaog pinaagi sa ilang tagsa-tagsa ka parachute.
Sumala sa video nga mikaylap online, nagbanggaan ang duha ka two-seat electronic warfare jets samtang naghimo og aerial exhibition. Mituyok kini sa ere ug nahagsa gawas sa base sa wala pa mibuto.
Gilockdown dayon ang Mountain Home Air Force Base ug gikansela ang nahibiling bahin sa air show aron hatagan og dalan ang emergency response ug imbestigasyon. Wala usab natalang nasamdan sa mga nanan-aw.
