GENERAL SANTOS CITY – Duha ka pulis sa Region 12 (Soccsksargen) nag-atubang sa posibleng dismissal sa serbisyo human nagpositibo sa paggamitan ug gidiling droga sa gipahigayon nga sorpresa nga mandatory drug tests.
Matud pa ni Lt. Col. Lino Capellan, public information officer sa Police Regional Office (PRO-12), na-relieved na sa ilang regular duties og gikatakda nga mupailawom sa confirmatory tests ang mga nasampit nga pulis nga wala niini gipanganlan.
Gibutyag ni Capellan, ang duha mga non-commissioned officers nga ang usa ang kanhi nadestino sa North Cotabato og ang lain pa nga usa ang nadestino sa GenSan partikular sa Fatima Police Station.
Una niini, mukapin sa 6,000 ka mga police commissioned, non-commissioned og non-uniformed personnel ang gipailawom sa mandatory drug tests kanaidtong Nov. 19, 2019 subay sa mando ni PRO-12 director, Brig. Gen. Alfred Corpus. Basi test results nga gipagawas sa Regional crime laboratory, ang duha ang nasuta nga nagpositibo sa paggamitan og gidiling droga.
Gibutyag ni Lt. Col. Capellan, giduso na ngadto sa Regional Internal Affairs Service ang kaso sa duha.
Sa pakighinabi kang P/Maj. Rexor Jake Canoy, tigpamaba sa GenSan City Police Office ang bag-uhay lamang nga surprise mandatory drug tests sa mga pulis sa Region 12 ang kabahin gihapon sa nagpadayong internal cleansing program sa PNP.
Ang pulis nga nagpositibo sa droga gikan sa Fatima PNP ang temporaryong gi-re-assigned sa City Police headquarters sa Camp Fermin Lira samtang gaabot og mando gikan sa PRO-12 aron mabalhin sa Regional Police Holding and Accounting Unit sa regional headquarters sa Barangay Tambler.
