GENSAN-Duha ka mga indibidwal ang nag-penitensya atol sa Biyernes Santo kon Good Friday ning adlawa.
Giila ang mga nasampit nga silang Danilo Guevarra og Jeboy Dela Peña nga pulos taga Barangay San Isidro.
Sa pakighinabi kanila sa Bombo Radyo Gensan, ilang gibutyag nga nagsugod kaganihang alas 6:00 sa buntag ang ilang pagbaklas gikan sa Purok Malakas Brgy. San Isidro hangtod nga nakaabot sa Queen Tuna Park sa Brgy. Dadiangas South ning syudad pasado alas 8:00 sa buntag.
Samtang nagabaktas nga nagtiniil lamang og may tabon ang ilang mga nawong, gilatos nila ang ilang mga likod kung asa walay suot nga pang-ibabaw nga sinena og nakapantalon lamang.
Gani, nagsunod kanila sa pagbaktas ang ilang tagsa-tagsa ka mga pamilya.
Managsamang gibutyag ni Guevarra og Dela Peña nga ang ilang pagpenitensya ang ilang panata sulod na sa pipila ka tuig sa matag Biyernes Santo.
Nasayran nga dihang nakaabot sa Queen Tuna Park naligo dayon silang duha og gibagnusan og mga dahon sa bayabas ang ilang mga likod.
