Gitaho sa Philippine Atmospheric, Geophysical and Astronomical Services Administration nga duha hangtod upat ka bagyo ang posibleng mosulod sa Philippine Area of Responsibility sa bulan sa Agosto.
Base sa Climate Outlook nga gipagawas sa state weather bureau, gilauman nga duha hangtod tulo ka bagyo ang mahimong masinati sa Setyembre, usa hangtod duha sa Oktubre, Nobyembre, ug Disyembre, samtang wala hangtod usa ka bagyo ang gilauman sa Enero 2027.
Matud usab sa PAGASA, posible nga mamugna ang usa ka kusog kaayong El Niño tali sa Oktubre 2026 ug Enero 2027. Bisan pa nga mahimo kining makapamenos sa gidaghanon sa mga bagyo, adunay gihapoy posibilidad nga ang pipila sa mga mabuo nga maot nga panahon mahimong mokusog ug mahimong super typhoon.
Dugang pa sa ahensya, gilauman ang halos normal nga gidaghanon sa ulan sa kadaghanan nga bahin sa nasud karong Agosto, apan posible nga makadawat og mas daghang ulan ang pipila ka bahin sa Western Luzon. Sa laing bahin, mas gamay nga pag-ulan ang gilauman sa pipila ka lugar sa Southern Luzon, Visayas, ug Mindanao.
Nagpasidaan usab ang PAGASA nga posibleng makasinati og dry spell sa katapusan sa Agosto ang pipila ka lugar sa Eastern Visayas ug Mindanao, samtang posible usab nga adunay drought sa Camarines Norte, Catanduanes, Biliran, Cebu, Negros Oriental, Northern Samar, Samar, ug Siquijor.
