GENSAN – Nagpagbilin sa kustodiya sa Traffic Management Unit ning siyudad ang driver sa prime mover nga nakabangga sa usa ka motorsiklo nga nagresulta sa pagkamatay sa duha ka gwardiya nga sakay sa motorsiklo.
Kasong reckless imprudence resulting to homicide ang atubangon sa driver sa truck nga si Christopher Abarquez, residente sa Valencia, Brgy. Cannery Site Polomolok, South Cotabato.
Kahinumduman nga ang mga biktima giilang sila si Kenneth Cademia, taga-Upper London, Brgy Bawing ning siyudad, ug Reymond Redo, taga-Matalam, North Cotabato.
Una niini, base sa imbestigasyon, gikan matud pasa Brgy. Calumpang ang truck ug paingon sa Makar area dihang mibangga dinhi ang motorsiklo nga gisakyan saa mga biktima nga gikan sa National Highway Brgy. Apopong.
Nawad-an matud pa ug kontrol ang motorsiklo ug unang mibangga sa konkretong island sa tunga sa dalan, ug mibangga sa atubangan sa truck, hinungdan nga napasok ilawom sa sakyanan ug naipit sa ligid.
Nadala pa sa balay-tambalanan ang mga biktima nga gituuhang naka-inom gumikan sa narekober nga resibo sa ilimnun sa ilang posisyon, apan gideklarang dead on arrival.
