GENERAL SANTOS CITY -Naka-kustodiya karon sa Polomolok Municipal Police Station ang duha ka dinakpan sa gipahigayong buy bust operation sa kapulisan sa Nat’l Highway Prk. 1 Brgy. Crossing Palkan Polomolok South Cotabato.
Kahibaluan, napalitan og usa ka pakete sa gituohang shabu ang nagpangalan og Omar Maguisulam, 24, walay trabaho nga taga Prk. 1 Brgy Sumbakil Polomolok og Abdul Mantawil, 20, taga Prk 8-A Brgy Polonuling Tupi South Cotabato.
Nakuha usab sa ilang posisyon ang laing duha ka sachet og buy bust money.
Matud pa kang P/Sr/Insp. Romeo Albano Jr sa nahisgutang presinto nga nakadawat sila og impormasyon kalabot sa katap nga illegal drug trade sa Crossing Palkan ug kasikbit nga mga lugar hinungdan nga nagpahigayon og operasyon nga nagresulta sa pagkadakop sa duha ka suspek.
Gawas sa druga, duha ka fragmentation grenade usab ang nakumpiska sa kapulisan gikan sa duha.
Gibutyag ni Albano, sa gipahigayon nga follow-up investigation, nasayran nga adunay kasong murder si Muntawil human nga gitudlong suspek sa pagpamusil patay kang Corporal Lemuel Gatinao.
Samtang may pending case sa korte si Maguisulam may kalabutan sa pagpangawat.
Pagkakaron, giandam na sa kapulisan ang kasong paglapas sa RA 9516 kon illegal possession of explosives batuk sa mga suspek.
