Gipailawom na sa pag-atiman sa City Social Welfare and Development Office (CSWD) ang duha ka Grade 9 nga estudyante sa Basilan National High School human giingong nangulata sa usa ka Grade 10 nga estudyante sa sulod sa tulonghaan sa Isabela City, Basilan kaniadtong Hunyo 25, 2025.
Kahinumdoman nga mikatag online ang video sa insidente, kung asa makita nga ginakulata sa duha ka estudyante ang 15-anyos nga biktima.
Sumala sa kapulisan, gipugos matod pa sa mga suspek ang biktima nga himuon ang usa ka butang nga supak sa iyang kabubut-on sama sa pagpanigarilyo.
Kasuhan sila ilawom sa Anti-Bullying Act alinsunod sa Juvenile Justice and Welfare Act tungod gikonsidera sila isip minors.
Sa pahayag usab sa principal sa tulonghaan gibutyag niining posible nga “kalingawan” lamang ang motibo sa pagpangulata.
Samtang gidala na ang biktima sa ospital tungod sa pagkalipong og pagsuka-suka, una gibalhin sa Zamboanga City alang sa mas maayo nga pagtambal.
Sa kasamtangan gipakusog na sa mga awtoridad ang pagbantay sa tulonghaan og gipa-andar na usab ang mga CCTV alang sa seguridad sa mga estudyante.
