DIGOS CITY– Nakaangkon og mga samad sa kalawasan ang duha ka mga bata human nga gipang-hostage sa tulo ka mga Persons Deprived of Liberty(PDL) atol sa selebrasyon sa Family Day sa Bureau of Jail Management and Penology(BJMP) compound sa Digos City District Jail, Barangay San Miguel, Digos.
Base sa report giila ang mga suspek nga silang Shelly Salda, Jobert Masday ug Dante Pindaton nga adunay mga kasong frustrated, murder ug homicide.
Samtang nagpadayon ang Family Day, kalit na lamang matod gipangbira sa mga suspek ang duha ka mga menor de edad nga biktima, nga nag-edad 5-anyos ug 10-anyos ug gitutukan og mahait nga butang.
Nasayran nga buot sa mga suspek nga makagawas ug mupauli sa ilang lugar sa Kiblawan, Davao del Sur.
Human sa negosasyon malampuson nga nakuha ug naluwas ang mga biktima nga nakaangkon og samad sa liog, nga sa kasamtangan anaa na sa stable nga kahimtang.
