GENERAL SANTOS CITY – Gi-awhag sa lokal nga panggamhanan ang mga residente sa dakbayan nga mukooperar gihapon sa sunod nga adlaw nga Dominggo sa ginapatumang “stay at home on Sunday” policy sa syudad taliwala sa padayong bahad sa coronavirus disease 2019 infection.
Kini tungod molungtad ang maong patakaran sa tibuok bulan sa Mayo.
Una nang gipasabot ni City Mayor Ronnel Rivera nga tumong sa maong lakang aron malimitahan ang paggawas sa publiko sa ilahang panimalay taliwala sa padaayong bahad sa COVID 19.
Kung wala’y importanteng lakaw o katuyuan angayang magpuyo lang sa balay.
Tungod niini nahimong mingaw ang mga kadalanan sa syudad kagahapong adlawa kung diin wala gitugutan nga mangabli ang mga business establishments, sama sa mga grocery stores, malls ug ang public market.
Samtang gipatuman ang checkpoints sa kapulisan sa nagkadaiyang mga kadalanan aron mabantayan ang pagsulod sa GenSan sa mga non-residents o ang mga maggikan sa laing mga silingang-lugar nga dili tugutan.
Samtang kagahapon usab suspendido ang operasyon sa Bulaong Terminal, diin, walay biyahe ang mga bus, passenger vans ug uban pang public utility vehicles.
Nasayran usab nga gipangunahan mismo ni GSCPO chief, P/Col. Gilberto Tuzon, ang istriktong pagpatuman sa gitakdang polisiya ilawom sa Executive Order 22 sa city government. Hinungdan nga gikanayong nahimong epektibo og malampuson ang unang implementasyon sa “stay at home on Sunday” policy sa dakbayan.
Nasayran nga wala’y natala nga mga dagkong untoward incidents dungan sa pagpatuman sa “stay at home on Sunday”.
