GENERAL SANTOS CITY – Sikop ang usa ka ka 18 anyos nga lalaki human gihulga ug gipabuthan ug sumpak ang duha ka motorista sa Sunrise Valley, Prk 23, Lagao, ning dakbayan.
Matud kang Police Chief Inspector Aldrin Gonzales, hepe sa Lagao Police Station, ang suspek giilang si Dandy Abarrientos, ulitawo, walay trabaho, miyembro matud pa sa mga batang sukarap, ug residente sa Lion’s Beach Brgy Dadiangas South ning siyudad.
Samtang ang mga reklamante mao silang Casper Batiller, 18 anyos, taga-Mateo Rd., Brgy Lagao, ug si Mike Tano, 21 anyos, taga-Brgy Labangal ning siyudad.
Sa impormasyon, alas-2:3o kagahapon sa kaadlawon samtang nagmaneho ug motorsiklo ang mga biktima, kalit matud pa silang gibabagan sa suspek nga nag-inom sa lugar, dayon gihulga ang mga nasampit ug nagpabuto ug sumpak.
Hinungdan nga midangop gilayon sa nasampit nga presinto ang mga biktima, ug dihang girespondehan sa kapulisan, naabtan nila ang suspek ug narekober ang usa ka sumpak nga may usa ka buhing bala.
Kasong grave threats ug illegal possession of improvised firearm ang giatubang karon sa suspek nga kasamtangang balhug sa selda sa nasampit nga presinto.
