Imbis nga walay klase ang iyang maangkon, kulungan hinoon ang iyang naadtuan.
Mao kini ang nahitabo sa usa ka 18-anyos nga estudyante sa Nueva Ecija human mag-post sa social media og bomb threat batok sa ilang eskuwelahan, nga iyang giangkon nga gibuhat lang aron masuspinde ang klase.
Human sa maong post, dinaliang miresponde ang Explosive Ordnance Disposal o EOD unit sa PNP aron susihon ang eskuwelahan.
Apan human sa pipila ka oras nga inspeksyon, walay nakitang bisan unsang bomba o explosives. Natultolan sa kapulisan ang estudyante ug gidakop.
Sa imbestigasyon, miangkon kini nga siya ang naghimo sa post ug ang iyang rason, gusto lang gyud unta niya nga walay klase. Karon, gikan sa pangandoy nga makalikay sa leksyon, leksyon na hinuon sa prisohan ang iyang giatubang.
Aduna pa gyud siyay tambag sa ubang batan-on: “Ayaw ninyo suwayi. Dili maayo ang sulod sa kulungan.” Ang maong estudyante karon nag atubang og kaso sa Anti-Bomb Joke Law ug Cybercrime Prevention Act of 2012.
Pahimangno sa tanan: Ang bomb joke dili komedya. Ang usa ka post nga gihimong “trip-trip” mahimong mosangpot sa tinuod nga kaso ug prisohan.
