GENERAL SANTOS CITY – Dead on arrival sa balay-tambalanan ang 17 anyos nga batang sukarap human napusilan atul sa riot sa duha ka grupo sa mga batan-on sa Riverside Salapan, Brgy Apopong ning dakbayan.
Sa inisyal nga imbestigasyon, natigayon ang insidente alas-4:48 kagahapon sa hapon, kung asa ang biktima giilang si John Mark Jolobilo, residente sa nasampit nga lugar.
Una niini, may natigayon matud pang riot tali sa duha ka grupo sa batang sukarap kung asa may natigayong pagbuto-buto gamit ang mga sumpak.
Dihang girespondehan sa kapulisan, nakumpiska ang duha ka pintik, usa ka sumpak nga may bala sa pusil, ug laing usa ka sumpak nga walay bala.
Nakaangkon ang biktima ug duha ka samad-pinusilan sa tuo nga abaga ug likod, kung asa nadala pa kini sa balay-tambalana apan gideklarang dead on arrival.
Narekober usab sa bulsa sa biktima ang mga bato.
Gipailawom pa karon sa pagsuta ang patay’ng lawas sa biktima, hilabi na nga gituuhang may miungot pa nga bala sa lawas niini.
