Gikumpirma sa Department of Migrant Workers nga temporaryong gipagawas sa mga awtoridad sa Qatar ang 17 ka mga Pilipino nga napriso tungod sa pag-apil sa protesta sa Doha, Qatar kaniadtong Marso 27.
Matod ni DMW Sec. Hans Leo Cacdac, ang mga Filipino gihatagan og “provisional release” samtang nagpaabot sa imbestigasyon.
Matud pa ni Cacdac, ang unang 12 ka mga Filipino nga lalaki gibuhian alas dos sa kaadlawon, oras sa Qatar, samtang ang lima ka mga babaye gibuhian mga alas kuwatro sa kaadlawon.
Gipasabot sa kalihim nga ang pagbuhi sa maong mga Filipino resulta sa direktiba ni Pang. Ferdinand Marcos, Jr. aron maseguro nga ma-release dayon ang mga kababayan ug mahatagan og legal ug welfare assistance ang maong mga Filipino.
Nasikop usab ang tulo ka menor de edad nga unang gibuhian sa mga otoridad.
