Napatay ang labing menos 17 ka tawo human giatake sa Russia ang Kyiv ug mga kasikbit nga lugar sa Ukraine gamit ang missiles ug drones.
Matud ni Ukrainian President Volodymyr Zelenskyy, migamit ang Russian forces og 29 ka missiles ug 115 ka drones atol sa maong opensiba.
Giingon ni Zelenskyy nga mas daghang kinabuhi unta ang maluwas kung igo ang suplay sa Ukraine sa missile interceptors o air defense systems nga makapugong sa mga pag-atake gikan sa kahanginan.
Lakip sa naigo ang mga bodega sa pribadong kompanya, logistics facilities, imprastraktura, ug usa ka estasyon sa tren.
Samtang, gipasanginlan sa Ukraine ang Russia nga gitarget ang mga pasilidad sibilyan, samtang giinsistir usab sa Moscow nga ang ilang mga giatake nga lugar adunay kalabotan sa suporta sa operasyon militar sa Ukraine.
Nagpadayon ang panagbangi tali sa duha ka nasud samtang nanawagan si Zelenskyy sa iyang mga kaalyado nga dugangan ang suporta sa air defense aron mapanalipdan ang mga sibilyan.
