GENERAL SANTOS CITY – Laing 17 ka NPA surrenderees ang midawat ug cheke isip insiyal nga cash assistance nga kabahin sa Comprehensive Local Integration Program.
Matud kang Lt. Silver Belvis, tigpamaba sa 39th Infantry Battalion Philippine Army, natigayon ang pag-award sa mga surrenderees sa provincial capitol sa Amas, Kidapawan, ug gitambungan nilang 39th IB Brigade Commander Col. Tyne Bañas, mga taga-DILG ug mga opisyal sa lokal nga panggamhanan sa North Cotabato.
Dungan niini, padayon ang panawagan ni Lt Belvis ngadto sa mga nahibiling rebelde sa kabukiran nga munaog na ug mutahan, dayon mubalik sa sabakan sa gobyerno, ug i-avail ang programa ug hinabang nga giandam sa gobyerno alang kanila, ug sa ilang pagbag-o sa kinabuhi.
Sumala pa nga angayang dili mahadlok ang mga nasampit sa pagtahan gumikan kanunay’ng andam ang gobyerno sa pagdawat kanila.
Gipanghimakak usab sa nasampit nga opisyal ang mga nanggawas nga taho nga matud pa mga sibilyan lamang ang ginakuha sa mga sundalo aron magpakaron-ingnon nga NPA aron ipa-surrender ug pangwartahan.
Gihingusgan ni Lt. Belvis nga propaganda lamang ang maong taho gumikan lehitimo ug tinuod gayud ang pagtabang nila sa mga rebelde nga mitahan ug nagdesisyon nga mubalik sa sabakan sa gobyerno.
