17 ka tao ang gidakop ug pasakaan og kaso human giingong nangbato ug nagsunog sa trailer truck atol sa anti-corruption protest sa Mendiola, Manila niadtong Domingo, Septiyembre 21, sumala sa Philippine National Police (PNP).
Ang mga dinakpan anaa na sa kustodiya sa Manila Police District (MPD).
Sa usa ka pahayag, gipasiugda sa PNP ang pagrespeto sa katungod sa pagpahayag sa mga lungsuranon, apan nanawagan alang sa kalmado ug paglikay sa kapintasan.
Ang kapulisan midugang nga sila nagpabilin nga komitado sa maximum tolerance, apan mohimo og aksyon batok sa bisan kinsa nga makadaut o makaguba sa kabtangan.
Ang mga lihok protesta gitambongan sa mga ordinaryong lungsuranon, ug pipila ka mga showbiz personalities isip panawagan nga patubagon ang mga kurakot nga opisyal sa gobyerno, ilabina may kalabotan sa kurapsyon sa mga proyekto sa flood control project.
Ang mga panagtapok nahitabo sa Rizal Park (Luneta), Mendiola, ug EDSA Shrine, dungan sa anibersaryo sa deklarasyon sa Martial Law sa panahon ni kanhi Presidente Ferdinand E. Marcos Sr.
