SARANGANI- Mikabat na sa 168 ka mga balay sa mga magtutudlo sa Glan, Sarangani Province ang nadaot tungod sa magnitude 7.8 nga linog.
Sumala ni Dona Panes, Chief sa Curriculum Implementation Division sa DepEd Sarangani, dako kaayong pagsulay alang sa mga magtutudlo ang maong nahitabo tungod kay dili lamang ang mga eskwelahan ang nadaot, kondili apil usab ang ilang mga pinuy-anan.
Matud pa niya, adunay mga magtutudlo nga karon nagpuyo ug natulog sa mga tolda o sa gawas sa ilang mga balay tungod kay dili na kini luwas puy-an human madaot sa linog.
Giasoy usab niya nga sa dihang nahitabo ang linog, adunay mga magtutudlo nga naglakaw sulod sa lima hangtod unom ka oras aron lamang makauli sa ilang mga panimalay tungod sa pagkaguba sa mga dalan ug mga pagdahili sa yuta apan sa ilang pagbiya gikan sa mga eskwelahan diin sila nagpanudlo ug human sa taas nga paglakaw pauli, ilang nasayran nga dili lamang ang mga eskwelahan ang grabeng nadaot, kondili pati usab ang ilang kaugalingong mga balay nga nahimong totally damaged tungod sa linog.
Kini ang pamahayag ni Dona Panes, Chief sa Curriculum Implementation Division (CID) sa DepEd Sarangani.
