Gikumpirma ni Sen. Francis ‘Chiz’ Escudero, nga napili isip presiding officer sa Senado nga molihok isip impeachment court, nga gikinahanglan ang labing menos 16 ka boto sa mga senador aron mapamatud-ang sad-an si Vice President Sara Duterte sa impeachment trial.
Sa iyang mensahe human niyang dawaton ang posisyon niadtong Lunes, matod ni Escudero nga klaro sa Konstitusyon nga walay opisyal sa gobyerno nga mahimong mapamatud-ang sad-an sa usa ka impeachment trial kung walay pagtugot sa two-thirds sa kinatibuk-ang miyembro sa Senado.
Gipasabot niya nga kini nga interpretasyon nahiuyon usab sa desisyon sa Supreme Court sa kaso nga Bayan v. Zamora niadtong 2000, diin gihisgutan ang gikinahanglang two-thirds nga boto sa Senado.
Matod pa niya, ang pagsunod niini importante aron mapanalipdan ang katungod sa respondent ug sa katawhan.
Gipasiugda usab ni Escudero nga katungdanan sa matag senador nga molihok isip hukom ang pagsunod sa naglungtad nga balaod, bisan unsa pa ang ilang personal nga pagtan-aw sa maong kaso.
Sa sayo pa, napili si Escudero isip presiding officer sa impeachment court pinaagi sa 12 ka boto pabor ug walo ka boto ang dili pabor. Siya usab ang nangulo sa impeachment court niadtong 2025 samtang nagserbisyo isip Senate President.
Gipahinumdoman usab niya ang iyang mga kaubang senador nga magpabiling patas ug walay pinalabi sa pagpaminaw sa kaso subay sa Konstitusyon ug sa naglungtad nga mga balaod.
