GENERAL SANTOS CITY – Balhug sa Makar Police Station ang usa ka bading ug 16-anyos nga babaye human nga aktwal nga nasakpan nga nag-pot session.
Giila ang mga dinakpan nga si Alyas Jane, 16-anyos, ug si Randy Amit, 20-anyos, taga-San Roque Labangal ning siyudad.
Gibutyag sa Bombo Radyo ni Police Chief Inspector Partich Elma, hepe sa nasampit nga presinto, nga nakadawat sila ug impormasyon kalabot sa gapahigayon ug pot session.
Hinungdan nga gilusad ang operasyon 1:15 sa hapon sa may Saway, Labangal, kung asa target ang nagpangalan ug Kimbo Alisin ug Donkoy Alisin, nga pulos residente sa lugar.
Apan nakasibat ang duruha human nakamatikod sa presensya sa kapulisan, kung asa misinggit ug midagan.
Hinungdan nga ang nahisgutang menor de edad nga babaye ug ang bading ang maoy naabtan sa akto sa mga otoridad.
Narekober sa lugar ang upat ka sachet sa shabu, mga drug paraphernalia, ug mga salapi.
Giandam na ang kasong pagsupak sa RA 9165 kon Comprehensive Dangerous Drugs Act of 2002 batok sa nasampit nga mga dinakpan.
