GENERAL SANTOS CITY – Kinse ka tuig hangtod tibuok kinabuhi nga pagkabilanggo ang atubangon kung musupak sa quarantine ang usa ka confirmed patient sa covid 19 didto sa Greece.
Matud pa ni Bombo International Correspondent Rafael Estanislao, usa ka vlogger nga atua sa Athens Greece apan taga Palawan, anaa sa 150Euro ang multa kung madakpan sa mga otoridad nga nakasupak atol sa ginapatuman nga lockdown nga gipatuman sukad niadtong March 13 dihang sunod-sunod na ang mga taong nataptan sa virus.
Gisiradhan gilayon ang tanang theater, mall, mga shops, mga tourist attractions, og ulahi ang airport apan nagpabilin ang mga delivery services og supermarkets.
Dugang niini, naka home quarantine ang mga tawo apan adunay hotline nga tawagan aron makakuha og Home quarantine pass aron makaadto sa supermarket. Dili limitado ang oras sa ilang pagpamalit basta didto lang sa lugar nga gitugtan nga makaadto.
Gipatuman ang 2 meters social distancing og pagsul-ob og face mask samtang kung sitahon sa kapulisan, ipakita ang text message nga nadawat gikan sa hotline, ID, residence permit og passport aron dili dakpon.
Ang mga legal nga nanarbaho sa Greece nga nawad-an og trabaho ang gihatagan sa gobyerno og tig 800Euro.
Ang mga legal workers mao kadtong nagbayad og insurance sa gobyerno.
Nahatagan usab og financial assistance kadtong mga seasonal workers sama sa nanarbaho kalabotan sa turismo.
Ang disiplina og pagsunod sa mga residente sa Greece sa mga patakaran nga gipatuman sa gobyerno og sayo nga pagpatuman sa lockdown ang tan-aw niini ang hinungdan nga wala na mikuyanap pa ang virus.
Gikabutyag nga sa Mayo 4 anam-anam nga paluagan ang lockdwon nga gipatuman sa maong nasud nga may kapin na sa 2,000 ang natalang kaso samtang kapin 100 ang death toll sa covid 19.
