Samaron ang 14 na katawo human nga mahagbong ang gisakyang tricycle sa kimba sa Barangay Progreso sa San Miguel sa Catanduanes.
Matud ni PMaj. Lester Quililan ang hepe sa San Miguel Municipal Police Station, gilayong miresponde ang ilang mga sakop dihang makadawat ug report nga usa ka tricycle ang nahagbong sa kimba nga adunay kalawmon nga 10 feet.
Nangayo na usab ug tabang ang kapulisan sa Municipal Disaster Risk Reduction and Management Council nga nagdala ug ambulansya sa pagresponde sa lugar.
Base sa imbestigasyon sa Philippine National Police, migawas nga nag-ulan dihang mahitabo ang insidente hinungdan nga danlog ang dalan hinungdan nawad-an ug kontrol ang driver ug nahgabong sa kimba.
Gibasol usab sa opisyal ang sobra-sobra nga sakay sa tricycle hinungdan nahitabo ang insidente.
Maayo na lamang nga hinay ang dagan sa tricycle hinungdan nga dili kaayo kusog ang impact sa pagkahagbong niini ug nakaangkon lamang ug mga samad sa lawas ang mga biktima.
Sa karon anaa na sa maayong kondisyon ang mga biktima nga nahatagan na ug medikal nga atensyon sa ospital.
