Labing menos 14 ka mga tao ang namatay ug dose-dosena pa ang samaron sa mapintas nga mga protesta tali sa mga raliyista ug pulis sa Kathmandu, Nepal, tungod sa desisyon sa gobyerno nga i-ban ang 26 nga mga platform sa social media sama sa Facebook, X (kanhi Twitter), ug YouTube.
Gisulong sa mga nagprotesta ang building sa parliamento ug misulay sa pagsulod, diin ang mga pulis gikataho nga nigamit ug mga armas batok sa mga nagprotesta diin nasamdan ug namatay ang pipila kanila.
Nasayran nga daan nang nangayo ang nagkalain-laing grupo sa paghunong sa social media ban ug korapsyon sa nasud.
Hinuon, gikatahong migamit usab ang mga pulis og tear gas ug water cannons apan napugos sila sa pagtago sulod sa parliament compound.
Gideklara usab ang curfew sa pipila ka bahin sa siyudad, lakip ang palibot sa parliamento ug sa presidential house, aron malikayan ang dugang kapintasan.
Gitawag sa mga awtoridad ang rally nga “Gen Z,” nga naglakip sa mga batan-on nga natao gikan sa 1995 hangtod 2010.
Ang pag-ban nahitabo human ang gobyerno gikataho nga nagpadala sa mga kompanya sa social media nga balik-balik nga mga pahibalo aron magparehistro, apan kadaghanan kanila napakyas, nga misangpot nga ilang i-ban.
Samtang ang TikTok ug Viber, nagpabilin nga naglihok sa nasud.
Sa laing bahin, adunay mga sugyot sa pag-regulate sa mga platform sa social media, aron pugson sila nga manubag sa ilang mga aksyon kung sila makit-an nga responsable, apan ang mga grupo sa tawhanong katungod nag-ingon nga kini itandi sa pagsensor ug pagsumpo sa gawasnon nga pagpahayag.
