Usa ka 14-anyos nga batang lalaki nga taga-Dallas, Texas, ang ni viral sa social media human makamugna og smartphone app nga maka-diagnose sa sakit sa kasingkasing sulod lang sa pito ka segundos.
Giila kini nga si Siddharth Nandyala ang nagmugna sa Circadian AI, usa ka bag-ong app nga naggamit sa artificial intelligence (AI) aron maminaw sa mga pinitik sa kasingkasing ug mahibal-an dayon kung adunay problema sa cardiovascular system sa usa ka tawo.
Si Siddharth dili ordinaryong bata. Siya ang labing bata nga AI-certified nga propesyonal sa kalibutan, ug adunay mga sertipikasyon gikan sa Oracle ug ARM.
Ang Oracle usa ka inila nga kompanya sa software ug database nga teknolohiya, samtang ang ARM usa ka teknolohiya nga gigamit sa mga processor, nagtabang sa mga gadyet ug mga himan nga molihok nga mas paspas ug mas episyente.
Ang Circadian AI app nasulayan na sa kapin sa 15,000 ka pasyente sa U.S. ug 700 sa India, ug adunay 96 porsiyento nga katukma sa pag-ila sa sakit sa kasingkasing.
Tungod sa iyang kalampusan, nakadawat kini ug pagdayeg gikan sa gobyerno sa India, nga nag-ingon nga ang dedikasyon ug talento sa batan-ong imbentor usa ka dako nga inspirasyon.
