Nagpahinumdom ang Department of Labor and Employment (DOLE) mga employer nga obligado sila nga mohatag sa 13th-month pay sa ilang mga empleyado dili molapas sa Disyembre 24.
Sumala ni DOLE Secretary Bienvenido Laguesma, walay eksepsiyon sa paghatag niini nga benepisyo tungod kay kini giisip nga usa ka katungod sa mga trabahante ug hinungdanon alang sa paghatag sa mga panginahanglan sa mga pamilya karong panahon sa kapaskuhan.
Ang 13th-month pay naglangkob sa tanang rank-and-file nga mga empleyado sa pribadong sektor, bisan unsa pa ang ilang posisyon, status sa trabaho, o pamaagi sa pagbayad, basta sila nagtrabaho sulod sa labing menos usa ka bulan karong tuiga. Apil niini ang mga piece-rate nga trabahante, mga empleyado nga adunay fixed wage plus commissions, mga trabahante nga adunay daghang amo, kadtong mga ni-resign o na-lay-off na kaniadto, ug kadtong naa sa maternity leave nga adunay salary differential.
Ang minimum nga 13th-month pay katumbas sa one-twelfth (1/12) sa kinatibuk-ang basic salary nga kinitaan sa usa ka trabahante sulod sa tuig.
Gipahinumdoman usab sa DOLE ang mga amo nga isumite ang ilang compliance report sa DOLE Online Compliance Portal hangtod Enero 15, 2026, nga adunay impormasyon bahin sa kompanya, gidaghanon sa mga empleyado, lista sa mga benepisyaryo, ug kantidad sa mga benepisyo nga nadawat.
