GENERAL SANTOS CITY – Trese ka mga sakop sa rebelding grupo nga sakop sa Committee Front 71 sa New Peoples Army (NPA) ang mikanaug sa bukid ug nagsurender sa mga otoridad samtang bitbit ang tulo ka tag-as nga kalibre sa armas.
Gikumpirma ni Lt. Col. Ronaldo Valdez, commanding officer sa 73rd Infantry Battalion nga ang grupo gipangunahan ni Willy Dawang nga adunay kaso nga frustrated murder nga napasang-at sa korte sa Tupi South Cotabato.
Matud sa opisyal nga gikinahanglan pa nga malimpyohan ang pangalan sa nahisgutang mga suspek tungod aduna kini mga kaso nga giatubang ug pagkahuman ipailawom sa proseso aron mahatagan ug financial assistance pinaagi sa E-CLIP program sa gobyerno.
Ang nahisgutang mga rebelde gitudlo nga responsable sa pagpanunog sa tulo ka mga classroom sa usa ka tulunghaan sa Sapu Padidu Malapatan Sarangani miaging mga bulan.
Luyo niini gipanghimakak usab sa mga nahisgutan nga sila ang responsable sa pagsunog sa naasoy nga mga tulunghaan luyo nga wala gibutyag kung may lain pang grupo sa mga armado nga naglihok sa kabukirang bahin sa Sarangani Province ug Davao Occidental.
