Usa sa matag napulo ka bag-ong kaso sa human immunodeficiency virus o HIV nga natala sa unang quarter sa tuig nakuha pinaagi sa transactional sex o sex nga may bayad.
Base sa datos nga gipagawas sa HIV and AIDS Surveillance of the Philippines, nagpakita nga moabot sa 5,101 ka kaso sa HIV ang natala gikan sa Enero hangtod Marso ning tuiga.
Sa maong gidaghanon, moabot ngadto sa 596 ka kaso o katumbas sa 12 porsiyento ang nakuha pinaagi sa transactional sex sa miaging 12 ka bulan.
Apil na niini kadtong nagbayad ug kadtong gibayran sa pakighilawas.
Sukad nga gitaho ang transactional sex niadtong 2012, niabot na sa 16,586 ka kaso ang natala.
Sumala sa Department of Health, 54% o 8,962 sa kinatibuk-ang mga kaso adunay kasaysayan sa transactional sex ug na-diagnose gikan sa 2020 hangtod 2025.
Una nang nanawagan ang DOH sa Malakanyang nga modeklarar og Health Emergency aron matubag ang padayon nga pagsaka sa HIV Cases sa nasud.
