GENERAL SANTOS CITY – Gipailawom sa profiling og dayon gi-lektyuran ang 12 ka mga lalaki sa ilang nahimong pagsupak sa balaud tungod sa pagsul-ob og uniporme sa militar.
Hinuon gipangbuhian gilayon ang mga nasampit human nga mipailawom sa mga naasoyng proseso dihang gidala sila sa Tacurong City Police Station.
Kahibaluan nga giharang sa mga sundalo sa checkpoint sa Tacurong city 12 ang mga nasampit nga lalaki tungod nakasul-ob ug uniporme sa army.
Nasayran nga nagsakay lamang og traysikel og motosiklo ang mga nasampit dihang miagi sa checkpoint . Mitindog nga opisyal sa grupo ang nagpailang si Major Datu Zama Zacaria.
Gihingusgan niini nga miyembro matud pa sila sa Bangsamoro Royal Armed Force Peacekeeping Group og paingon sila sa Liguasan MArsh sa Sultan sa Barungis Maguindanao aron magbantay sa oil exploration.
Depensa sa nasampit, gitugutan matud pa sila sa 33rd IB nga magsuot og uniporme sa militar.
Apan nasuta gikan sa commander sa 33 rd IB nga wala sila naghatag ug pagtugot sa unsa mang grupo nga mugamit og uniporme sa AFP o sa PNP man.
