GENSAN – Usa ka trahedya ang nahitabo sa Zone 4, Purok Mudia Extension, Barangay Labangal, General Santos City kagahapon sa hapon, Agosto 20, human mibusikad ang granada sa usa ka batang babaye.
Giila ang biktima nga si Angel Malayon Malid, 12 anyos, residente sa nahisgutang lugar.
Base sa imbestigasyon sa kapulisan, ang bata giingong namote-bakal og gituohang nakapunit og granada nga giputos og electrical tape.
Gidala kuno kini ni Angel sa ilang balay ug gigunitan samtang nagsakay sa duyan.
Kalit lang kining nibuto hinungdan nga naputhan sa duha niini ka kamot ug nawasak ang dughan ug nawong nga namatay diha-diha.
Matod ni PMaj. Miguel Angelo Quidilla, station commander sa Makar PNP, nakuha sa Forensic Unit ang mga ebidensiya gikan sa crime scene sama sa safety pin, safety pin ring, lever ug ubang parte sa granada.
Nasayran nga wala na mag-eskwela ang biktima ug naanad na kini sa pagpamote-bakal matag adlaw sa palibot sa Purok Mudia.
Sa pagkakaron nagpadayon ang mas lawom nga imbestigasyon aron masuta kon diin gikan ang maong granada..
