Gilubong sa Gaza City ang 112 ka sakop sa pamilyang Abu Sharia ug Hasayna tulo ka tuig human sila mapatay sa usa ka Israeli airstrike niadtong Nobyembre 23, 2023.
Gatusan ka mga lumulupyo ug mga kapamilya ang mitambong sa seremonya sa paglubong sa Baptist Cemetery, diin ang mga bangkay sa mga biktima gidala sa kapin 100 ka stretcher nga gitabonan sa bandila sa Palestine.
Sumala sa mga naluwas nga sakop sa pamilya, hapit tulo ka tuig nilang gipangita ang mga lawas sa ilang mga minahal uban sa Gaza Civil Defence.
Ilang giingon nga usahay kamot na lamang ang ilang gigamit sa pagpangita tungod sa kakulang sa mga excavator ug uban pang heavy equipment sa nagun-ob nga lugar.
Matud ni Mahmoud Hasayneh, usa sa mga sakop sa pamilya, mibalik ang dakong kasakit sa ilang panimalay samtang ilang gilubong ang ilang mga minahal.
Ang maong airstrike nahitabo sa unang mga bulan sa gubat tali sa Israel ug Hamas, nga miresulta sa pagkamatay sa daghang sibilyan ug grabeng pagkaguba sa maong komunidad.
