Gikumpirma sa Department of Migrant Workers (DMW) nga 11 pa ka mga Filipino seafarer nga naluwas gikan sa nalunod nga MV Magic Seas human giatake sa mga rebeldeng Houthi.
Sa usa ka press briefing kagahapong adlawa, si DMW USec. Bernard Olalia niingon nga ang 11 ka tripulante nalakip sa 17 ka Filipino seafarer nga naluwas.
Ang 11 ka tripulante gipaabot nga modunggo sa Ninoy Aquino International Airport (NAIA) kagabii. Gipaklaro nga makadawat sila og tabang gikan sa gobyerno.
Niadtong Biyernes sa gabii, Hulyo 11, niabot ang unang unom ka Pinoy nga tripulante sa MV Magic Seas. Ang chief officer, 2nd officer ug 3rd officer sa barko niabot sa NAIA Terminal 1 samtang ang uban niabot sa Clark International Airport.
Nakadawat sila og P75,000 matag usa gikan sa AKSYON Fund sa DMW ug Emergency Repatriation Fund sa OWWA ug P10,000 matag usa gikan sa DSWD.
Kahinumduman nga giataki sa mga rebeldeng Houthi ang barko nga MV Magic Seas nga adunay bandera sa Liberia samtang kini miagi sa Red Sea hinungdan nga naunlod kini niadtong Hulyo 6, apan maayo na lang kay naluwas ang tanang 22 ka tripulante nga sakay niini.
