SARANGANI- Gipangunahan ni Sarangani Governor Rogelio D. Pacquiao ang pag-apod-apod sa duha ka libo ka pesos nga tabang sa matag usa sa 1,000 ka drayber sa public utility vehicle o PUV sa lungsod sa Glan ning adlawa, Oktubre 1.
Gipahigayon ang pag-apod-apod sa Glan Municipal Plaza aron makatabang sa mga drayber sa pagsagubang sa misaka nga presyo sa lana ug sa nagkadakong gasto sa ilang operasyon.
Gipadayag ni Gov. Pacquiao ang kamahinungdanon sa tukmang panahon nga interbensiyon sa gobyerno aron matubag ang mga panginahanglan sa mga mamumuo ug sa ubang sektor nga nanginahanglan og tabang.
Gipatuman ang maong programa pinaagi sa Provincial Social Welfare and Development Office o PSWDO nga gipangulohan ni OIC-PSWDO Buenaventura Solarte, inubanan sa koordinasyon sa lokal nga panggamhanan sa Glan ubos sa pagpangulo ni Mayor Victor James Yap Sr.
Tumong sa maong inisyatiba nga masiguro ang hapsay ug episyenteng pag-apod-apod sa pinansyal nga ayuda ngadto sa mga drayber.
Kabahin kini sa mas lapad nga programa sa provincial government sa paghatag og proteksiyon ug tabang sa mga sektor nga labing naapektuhan sa nagpadayon nga pagsaka sa gasto sa panginabuhi, ilabina ang mga mamumuo sa sektor sa transportasyon.
