GENERAL SANTOS CITY – Usa ang nakabsan sa kinabuhi samtang laing tulo ang nasamdan sa pagkarambola sa tulo ka sakyanan sa Barangay Crossing Palkan, Polomolok, South Cotabato pasado alas-2 kagahapon sa hapon.
Matud ni Police Corporal Alexander Cruz sa -traffic division sa Polomolok, Municipal Police Station nga nag-overtake ang Nissan Navarra pick up sa jeep nga nagkarga ug mga trabahante sa DOLE Philippines padulong sa Tupi apan gumikan sa makusog nga pag- ulan nadakin-as ang pick-up ug nabangga sa katagbo nga closed wing van nga nagresulta sa pagbangga .
Matud sa kapulisan nga nakibyasan sa pick-up ang jeep hinungdan sa pag-angkon ug danyos samtang totally wreck usab ang atubang nga bahin sa pick up kung asa dead on arrival ang usa sa sakay niini nga giila nga Dagaman Salanda, naa sa legal nga edad ug residente sa Barangay Lotilla, Isulan, Sultan Kudarat.
Nasamdan usab ang driver sa pick up nga giila nga si Salidhitan Nurudin ug ang duha pa ka kauban .
Luwas usab ang driver ug pahinante sa wing van lakip ang driver ug dose ka pasahero sa jeep.
Sa kasamtangan ginasusi pa ang medical bulletin sa tulo ka nasamdan lakip na ang driver sa pick up.
