GENERAL SANTOS CITY – Mukabat sa P2.7 million nga kantidad sa marijuana ang nakumpiska sa mga operatiba sa PDEA-12 ug kapulisan sa gipahigayon nga buy–bust operation sa Sitio Morok, Brgy. Datal Batong, Malungon, Sarangani Province, Oktobre 23, Martes.
Target sa operasyon ang high value target nga si Alias Mel Enoc, nga napatay human nakigpinusilay sa mga pulis human nakamatikod sa presensya sa mga otoridad.
Samtang nasikop ang usa ka Antonio Mandoan Alias Tata, 37-anyos, nga kauban ni Enoc.
Ang duha ang pulos mga residente sa lugar.
Narekober ang mukabat sa 5,000 grams sa marijuana dried leaves nga may estimated market value nga P600,000; usa ka garand rifle ug mga bala gikan sa mga suspek.
Human niini, nagpahigayon usab ug marijuana eradication sa nasampit gihapon nga lugar ang mga operatiba, ug narekober ang anaa sa 10,536 uprooted marijuana plants nga may estimated market value nga kapin P2.1milyon.
Gilayong giguba ang mga pananom nga marijuana, samtang pito niini ang gisumite sa PDEA XII Laboratory Section aron ipailawom sa laboratory examination.
Nag-atubang karon ug kasong pagsupak sa Section 5 o pagbebenta, ug Section 11 o paghupot ug iligal na droga, sa RA 9165 o Comprehensive Dangerous Drugs Act of 2002 ang nasikop nga suspek.
