GENERAL SANTOS CITY– Patay ang wala maila nga motorista nga nakabangga sa usa ka topdown unit kaganihang alas tres pasado sa kabuntagon sa Conel road barangay San Isidro ning syudad.
Basi sa gihimong imbestigasyon sa Traffic Management Unit nga nagka head-on ang motorsiklo sa biktima ug ang topdown sa laing biktima nga maneho sa nagpangalan ug Ruel Butaya Crisostomo nga residente sa Purok 2 Katangawan ning syudad.
Sa kakusog sa pagbangga nakaangkon ug samad sa nawong ug tiil ang biktima sa motor samtang mga samad sa lawas ug ulo usab kang Crisostomo.
Nasuta nga gideklara nga dead on arrival ang biktima samtang anaa sa delikado nga kahimtang ang ikaduha nga biktima.
Ilhanan lamang sa biktima ang sul-ob niini nga T shirt nga adunay marka nga singapore ug kulay blue nga pantalon.
Nakuha usab sa iyang bulsa ang celphone ug relo. Naa na sa usa ka punerarya ang matay nga lawas sa biktima samtang ang motor niini nga skygo ang gidala sa Traffic Management unit sa kapulisan.
