GENERAL SANTOS CITY – Usa ka miyembro sa Bangsamoro Islamic Freedom Fighters(BIFF) ang namatay samtang usa ka sundalo usab ang samdan sa engkwentro sa Brgy. Tukanalipao, Mamasapano, Maguindanao.
Sumala pa ni 6th Infantry Division Philippine Army Spokesperson Capt. Arvin Encinas, nagpahigayon og security operation ang tropa sa 40th Infantry Battalion dihang natagbuan ang dili muobos 20 ka armadong kalalakihan.
Nagresulta kini sa pagkamatay sa usa ka BIFF member nga padayon pang giila sa militar og pagkarekober sa mga tag-as nga kalibre sa armas og mga gamit og sangkap sa paghimo og Improvised explosive device (IED).
Milungtad usab og pipila ka oras ang bayluanay ug buto bag-o miatras ang mga armadong kalalakihan.
Samtang wala gipanghimakak ni Capt. Encinas nga usa ka sundalo nga wala una niini gipanganlan ang slighty wounded apan gisiguro nga nagmaayo na ang kondisyon.
Gibutyag sa opisyal, adunay mga pat-ak sa dugo nga nakita sa kasundalohan sa encounter site hinungdan nga gilauman nilang adunay mga samaron sa bahin sa mga armadong lalaki.
