GENSAN- Usa ka malampusong operasyon sa pagpatuman sa balaod ang nagresulta sa pagkasakmit og kapin ₱1.3 milyones nga balor sa smuggled nga sigarilyo ug pagkasikop sa usa ka suspek sa Barangay Labangal, General Santos City, niadtong Septiyembre 22, 2025.
Ang hiniusang operasyon gipangulohan sa Police Station 2, uban sa SWAT, CIU, CMFC sa General Santos City Police Office (GSCPO), ug Gensan MARPSTA, uban ang suporta sa Bureau of Customs (BOC).
Base sa imbestigasyon, misugod ang operasyon dihang nabantayan sa kapulisan ang usa ka traysikol nga nagpundo sa atubangan sa balay sa suspek nga nailhan sa alyas “Titing”, 48 anyos, minyo ug usa ka mag-uuma.
Pag-abot sa patrol vehicle, duha ka wala mailhing lalaki ang midagan palayo ug gibiyaan ang traysikol diin narekober ang tulo ka kahon sa Gajah Baru nga sigarilyo nga nagkantidad ug ₱117,870.00.
Sa mas lawom nga pag-inspeksyon sa balay sa suspek, nakit-an sa mga operatiba ang daghang nakatago nga smuggled nga sigarilyo: upat ka kahon sa Tabaco One, 16 ka kahon sa King Perfect, pito ka kahon sa Cannon Menthol, ug walo ka kahon sa Gajah Baru. Gibanabana sa BOC nga ang tanang nakumpiskar adunay market value nga ₱1,375,150.00.
Walay armas o bala nga narekober sa lugar. Tungod niini, gilusad dayon ang pagdakop sa suspek ubos sa paglapas sa Republic Act 10863 o Customs Modernization and Tariff Act.
Ang mga nakumpiskang kontrabando gi-markahan ug gi-imbentaryo sa lugar sa operasyon ug gilakip sa dokumentasyon sa BOC.
Samtang ang ikaduhang search nga gihimo sa laing balay nga gipanag-iyahan gihapon sa dinakpan, negatibo ang resulta.
Ang suspek anaa na sa kustodiya sa Police Station 2 alang sa booking ug tukmang disposisyon, samtang ang tanang ebidensya gi-turn over na sa Bureau of Customs sa General Santos City.
Padayon pa ang follow-up nga imbestigasyon aron ma-ila ang duha ka lalaki nga nakalikay sa operasyon ug aron matino ang ilang koneksyon sa smuggling activities.
