JAS,DAVAO OCCIDENTAL-Naghiusa ang Municipal Disaster Risk Reduction and Management Office (MDRRMO) sa Jose Abad Santos, kauban ang Provincial Disaster Risk Reduction and Management Office (PDRRMO) ug MDRRMO sa Don Marcelino, alang sa pagpahigayon sa Rapid Damage and Needs Assessment (RDNA) human sa kadaot nga nahimo sa gipasamot nga Southwest Monsoon o Habagat nga dala sa Bagyong Inday.
Matod sa inisyal nga report, walo ka indibidwal ang gireport nga missing, samtang usa ka survivor ang gidala ug gitambalan sa Tomas Lachica District Hospital. Aduna usab mga balay nga naanod tungod sa kusog nga pagbunok sa ulan.
Gisusi sa mga responder ang kahimtang sa mga apektadong barangay sama sa Malalan, Tanuman, Kalbay, Butuan, ug Sugal aron matino ang gidak-on sa kadaot ug mahibaluan ang dinaliang panginahanglan sa mga naapektuhang pamilya ug komunidad.
Ang resulta sa RDNA gamiton isip basihan sa pagplano sa tukmang aksyon alang sa responde, relief assistance, rehabilitasyon, ug pagbangon aron masiguro nga makaabot ang tabang ngadto sa labing naapektuhan sa kalamidad.
